Bu barədə Prezidentin İcra Aparatının Xarici əlaqələr şöbəsinin müdiri Novruz Məmmədov məlumat verib. Prezident həmsədrlərlə NATO sammiti çərçivəsində görüşüb.
Novruz Məmmədov «AzərTAc»a bildirib ki, dövlət başçısı həmsədr ölkələrin BMT-də Azərbaycanın işğal olunmuş ərazilərində vəziyyətlə bağlı qətnamənin əleyhinə səs vermələrinə aydınlıq gətirilməsini istəyib. Həmsədrlər Azərbaycanın ərazi bütövlüyünü dəstəklədiklərini vurğulayıblar.
Diplomatlar öz mövqelərini yayacaqları xüsusi bəyanatda da bildirəcəklər.
Həmsədr ölkələr martın 14-də BMT Baş Assambleyasının 62-ci sessiyasında sözügedən qətnamənin əleyhinə səs veriblər.
Sonradan həmsədrlər belə addım atmalarının səbəblərini açıqlayıblar: «Tərəflər razılığa gəliblər ki, bütün detallar yalnız hər iki tərəfin razılığından sonra qüvvəyə minə bilər. Amma, BMT Baş Assambleyası tərəfindən qəbul olunan bu qətnamə layihəsi yalnız bir tərəfin maraqlarından çıxış edir və Minsk qrupu həmsədrlərinin balanslaşdırılmış ərazi bütövlüyü təklifini nəzərə almır. Minsk qrupuna həmsədr olan ölkələr bu qətnamə layihəsini qənaətbəxş saymadığına və ayrı-seçkilik kimi qiymətləndirdiyinə görə bu birtərəfli qətnamənin əleyhinə çıxıblar».
