Martın 5-də saat 12 radələrində İnformasiya və Texnologiya İnstitutunun yeddinci mərtəbəsində yanğın baş verib. Yanğın həmin mərtəbədə olan Şamaxı Astrofizika Rəsədxanasının Bakı ofisində olub. Nəticədə akademik Hacıbəy Sultanov vəfat edib. Bunu «Azadlıq» radiosuna İnformasiya və Texnologiya İnstitutunun direktoru Rasim Əliquliyev deyib:
«Çox təəssüflər olsun ki, rəsədxananın Bakı ofisində çalışan akademik Hacıbəy Sultanov kəskin boğucu iylərdən boğularaq vəfat edib. O, yanğından yox, məhz boğucu iydən ölüb. Çünki bizə deyilənlərə görə, onun meyitində yanğın əlamətləri olmayıb».
Rasim Əliquliyev bildirir ki, yanğın böyük bir hissəni əhatə etməyib. Ancaq buna baxmayaraq bina boşaldılıb.
Yanğının baş vermə səbəbləri araşdırılır.
Hadisə zamanı vəfat edən akademik Hacıbəy Sultanov 1921-ci ildə anadan olub. O, fizika-riyaziyyat elmləri doktoru və Şamaxı Astrofizika Rəsədxanasının şöbə müdiri idi.
