Adları hüquq müdafiəçilərinin siyasi məhbus siyahısında olan 2 nəfər-keçmiş Xüsusi Təyinatlı Polis Dəstəsinin üzvü Səxavət Hümbətov və «Yeni Fikir» Gənclər hərəkatının sədr müavini Ramin Tağıyev azadlığa buraxılıb. Onların azadlığa buraxılması barədə məhkəmə qərarı fevralın 27-də çıxarılıb. Bu barədə «Azadlıq» radiosuna Penitensiar Sistemin mətbuat xidmətinin rəhbəri Mehman Sadıqov bildirib.
Hüquq müdafiəçisi Leyla Yunus hesab edir ki, Ramin Tağıyev onsuzda cəzasının çoxunu çəkmişdi. Əslində o, əfv fərmanı ilə da azad edilə bilərdi. Onun fikrincə, hakimiyyət Ramin Tağıyevi sonradan onun Avropa Məhkəməsində bəraət almaması üçün azad edib.
Hüquq müdafiəçiləri və dövlət rəsmilərinin daxil olduğu işçi qrupunun üzvü Səidə Qocamanlı isə deyir ki, onlar Səxavət Hümbətov və digər xəstə məhbusların həbsdən azad edilməsi məsələsini dəfələrlə müzakirə ediblər.
Onun sözlərinə görə martın 13-də Strasburqda Azərbaycana siyasi məhbuslar üzrə həmməruzəçi təyin olunması məsələsinə baxıla bilər. Səidə Qocamanlı deyir ki, həmin vaxtadək başqa məhbusların da azad edilməsinə çalışacaqlar.
Ramin Tağıyev 2005-ci ilin yayında dövlət çevrilişinə cəhdə ittiham edilərək 4 il müddətinə azadlıqdan məhrum edilmişdi.
Dövlət çevrilişinə cəhdlə yanaşı, vətənə xəyanətdə də günahlandırılan Səxavət Hümbətov isə 1996-cı ildə 15 il müddətinə azadlıqdan məhrum edilmişdi.
