«ATƏT Azərbaycandakı siyasi vəziyyəti həssaslıqla izləyir». Bunu Bakıda səfərdə olan Finlandiya parlamentinin beynəlxalq əlaqələr komitəsinin sədri Pertti Salolaynen «Azadlıq» radiosuna müsahibəsində bildirib.
O, Bakıya prezident seçkisi ilində ölkədəki vəziyyət barədə məlumat toplamağa gəlib. Dediyinə görə, topladığı məlumatı ATƏT-in fəaliyyətdə olan sədri, Finlandiyanın Xarici İşlər naziri İlkka Kanervaya təqdim edəcək.
Pertti Salolaynen: «ATƏT sədri gələn ay Azərbaycana səfər edəcək. ATƏT-ə sədrlik edən ölkə kimi, Finlandiya Azərbaycana diqqətini artırmaqdadır. Biz müxtəlif məsələlərdə, o cümlədən daxili siyasi proseslər və münaqişələrin həllinə öz töhfəmizi vermək istəyirik. Biz həm də prezident İlham Əliyevin may ayında Finlandiyaya səfərə gələcəyini gözləyirik».
Son illər Azərbaycanın enerji mənbəyi kimi Avropa üçün artan əhəmiyyətini vurğulayan Finlandiya rəsmisi, Qərbin nefti demokratiyaya dəyişməsi kimi fikirlərlə razılaşmır. O, xatırladır ki, Avropanın aparıcı institutları son vaxtlar Azərbaycanda mətbuat və sərbəst toplaşmaq azadlığı ilə bağlı narahatlıqlarını dəfələrlə dilə gətiriblər.
Salomaynen onu da vurğulayıb ki, ATƏT Azərbaycanda baş verən proseslərə biganə qalmayacaq.
ATƏT-in Bakı Ofisindən «Azadlıq» radiosuna verilən məlumata görə, İlkka Kanerva Bakıya fevralın 28-də səfər edəcək.
