ABŞ Prezidenti Corc Buş Qurban bayramı münasibətilə bütün müsəlmanları təbrik edib.
Amerika prezidentinin məktubunda deyilir: «Qurban bayramında dünya müsəlmanları İbrahim peyğəmbərin oğlunu qurban vermək istənilərkən göstərdiyi əyilməz inam və Allaha olan etimadını yad edirlər. Müsəlmanlar bu dörd günü ailə və dostlarla birgə bayram etməklə, İbrahim peyğəmbərin itaətkarlığına ehtiramlarını bildirir və Allahın bəxş etdiyi çoxsaylı nemətlərə görə şükranlıq edirlər».
Cənab Buş vurğulayır ki, bu bayram mərhəmət və sədaqət kimi vacib dəyərlərin gələcək nəsillərə ötürülməsinə kömək edir.
Təbrikdə daha sonra deyilir: «Amerika bir çox inamın vətənidir və müsəlman vətəndaşlarımız bizim cəmiyyətimizi zənginləşdirirlər. Amerika müsəlmanlarının bu bayram günlərində və il boyu nümayiş etdirdiyi mərhəmət, səxavət və xoş iradə dövlətimizin qüdrət və qabiliyyətini gücləndirmişdir. Qoy bu sevincli günlərdə Qurban bayramını qeyd edənlərin qəlbi sevgi və nura qərq olsun».
