«Bir sıra polis idarələrində bu gün keçirdiyimiz monitorinq nəticəsində işgəncə və qanunsuzluq faktları aşkar etdik». İşgəncələr Əleyhinə Komitənin sədri Elçin Behbudov bu sözləri «Turan»ın müxbirilə söhbətində söyləyib.
O, dekabrın 13-də Siyəzən, Dəvəçi, Xaçmaz, Quba rayon polis idarələrində monitorinq apardığını bildirib. E.Behbudovun sözlərinə görə, müvəqqəti saxlama yerləri standartlara uyğunlaşdırılsa da, pozuntular da var.
Hüquq müdafiəçisi konkret polis idarəsinin adını çəkmədən bir işgəncə faktı aşkarladığını deyib və bildirib ki, müstəntiq izahatlara qol çəkdirmək üçün müttəhimə zor tətbiq edib və nəticədə müttəhimin dişlərini qırıb.
Onun sözlərinə görə, başqa ciddi qanun pozuntusu müttəhimin polisdə ən uzağı 48 saat saxlana biləcəyi halda, artıq bir həftədir ki, idarədə saxlanmasıdır.
E.Behbudov aşkar edilmiş hüquq pozuntuları və onların aradan qaldırılması ilə bağlı daxili işlər naziri Ramil Usubova müraciət edəcəyini bildirib.
