2007-ci ildə dünyada jurnalist ölümü rekord həddə çatıb. Bunu İnformasiya Təhlükəsizliyi üzrə Beynəlxalq İnstitut (İnternational News Safety İnstitute - İNSİ) açıqlayıb.
Bildirildiyinə görə, yanvarın 1-dən noyabrın 28-dək 35 ölkədə 142 jurnalist və KİV-də çalışan 29 müxtəlif əməkdaş (sürücülər, tərcüməçilər və texniki işçilər) həlak olub.
Bu rəqəm 2006-cı ildəki göstəricini (106) kölgədə qoyur.
İnstitutun açıqlamasında qeyd edilir ki, KİV əməkdaşlarının 121 nəfəri öz vəzifələrini yerinə yetirərkən həlak olub, 15 nəfəri təsadüfi güllə yarasından, 34-ü isə yol və aviasiya qəzalarında dünyalarını dəyişib. Bir nəfərin ölüm səbəbi isə məlum deyil.
İNSİ-nin açıqlamasına görə, keçən il KİV əməkdaşlarının əksəriyyəti İraqda (64 nəfər) ölüb (Müharibə başlayandan bu ölkədə ölən KİV əməkdaşlarının sayı 235-dir). Bu siyahıda ikinci yerdə Şri-Lanka (6 nəfər) gedir. Əfqanıstan, Meksika, Hindistan və Filippinin hər birində 5, Pakistan, Somali və Haitinin hər birində 4 nəfər ölüb.
İNSİ-nin məlumatında qeyd edilir ki, 1996-cı ildən 2007-ci ilin ortalarına qədər dünyada vəzifəsini yerinə yetirərkən ən azı 1200 KİV əməkdaşı dünyasını dəyişib. Onların üçdə ikisini öldürüblər. «Media forum»