Bu yaxınlarda 40 yaşını qeyd edən Bakı metropolitenində yaxın illərdə yeni stansiyalar tikiləcək. Bu haqda «Azadlıq» radiosunun «Can Bakı» verilişinin qonağı Tikilməkdə olan Bakı Metropoliteni müdiriyyətinin rəisi Arif Rəsulov məlumat verib.
O, bildirib ki, gələcəkdə əhalinin sıx yaşadığı zonalara da metro çəkiləcəyi nəzərdə tutulub. Özü də yerin altı ilə yox, üstü ilə. Nəzərdə tutulub ki, Rəsulzadə qəsəbəsinədək metro stansiyası yerin altı ilə, Binəqədi, Novxanı, Corat və Sumqayıta qədər isə yerin üstü ilə çəkilsin.
«Belə olduqda həm şəhərə gələn xarici qonaqlara gözəl yerlərimizi göstərmək imkanı qazanacağıq, həm də yerüstü metronun tikintisi daha ucuz başa gələcək».
Yeraltı metronun 1 kilometrinin çəkilişi 60 milyon dollara başa gəlirsə, yerüstü metroda bu rəqəm 17-20 milyon dollardır.
Hazırda Bakı metropolitenində mövcud olan iki xətt gələcəkdə ayrılacaq və əlavə olaraq bir dairəvi xətt formalaşacaq. Arif Rəsulov deyir ki, xətlərdən biri Sabunçu, Ramana və Bülbülədən keçməklə H.Əliyev adına Hava limanınadək çəkiləcək. Xətlər ayrılandan sonra sərnişinlər «28 may» metro stansiyasında düşüb növbəti qatarı gözləməyəcəklər. «Cəfər Cabbarlı» stansiyasına keçib xətti dəyişdirəcəklər. Bundan sonra qatarlar arasında interval ən çoxu 2 dəqiqə olacaq.
Gediş haqqına gəlincə, müdiriyyət rəisi Arif Rəsulov söylədi ki, hələlik metro haqlarının artımı nəzərdə tutulmayıb: «Hazırda hər gün metro 650 min sərnişin daşıyır. Onların hər birinin daşınması 35 qəpiyə başa gəlir. Metro dövlət dotasiyası hesabına işləyir. Əgər bu haqq dövlət tərəfindən ödənilsə, biz sərnişinləri lap pulsuz da daşımağa hazırıq».