Keçid linkləri

2016, 10 Dekabr, şənbə, Bakı vaxtı 05:14

«Azadlıq» qəzeti baş redaktorsuz...


Təmirsiz üç otaqdan birində Qənimət Zahidin oturduğu stol boşdur

Təmirsiz üç otaqdan birində Qənimət Zahidin oturduğu stol boşdur

...Qənimət Zahidin həbsindən sonra «Azadlıq» qəzetinin redaksiyası həmişəkindən daha hay-küylüdür. İndi redaksiya əməkdaşları təkcə yaradıcılıqla məşğul olmur, həm də baş redaktorun müdafiəsiylə bağlı texniki işləri görür.


«Sabah saat 5-in yarısında Beynəlxalq Mətbuat Mərkəzində Qənimət Zahidlə bağlı tədbir var, sən də ora dəvətlisən, imkan et, gəl...».


«Azadlıq» qəzetinin redaktor müavini Sücəddin Şərifov qarşısına iri bir siyahı qoymuşdu. Sabahkı müdafiə tədbirinə dəvət olunanları çağırırdı.


Qəzetin direktoru Azər Əhməd deyir ki, Qənimət Zahidin həbsindən sonra işlər çoxalıb. Redaksiya heyəti əlindən gələni edir ki, qəzetin çapı bir günlüyə də dayanmasın:


Azər Əhməd: «Xatırlayıram, 1992-ci ildə «Azadlıq» qəzetinin üç yaşının tamamında o vaxt Naxçıvan Ali Məclisinin sədri olan Heydər Əliyevin bizə bir təbrik məktubu var idi. Əvvəl «Azadlıq» qəzetini tərifləyib, sonra yazırdı ki, «indiki hakimiyyətin qorxusundanmı, yoxsa hansısa başqa səbəbdən bəzən siyasi hakimiyyətdən çox ciddi, daha radikal yazılar vermirsiz». Təəssüf ki, elə Heydər Əliyevin prezidentliyi dövründən «Azadlıq» qəzetinə ciddi təzyiqlər başladı, son beş ildə isə siyasi hakimiyyət «Azadlıq» qəzetinə qarşı total hücuma keçib. «Azadlıq»a qarşı üst-üstə 20-yə qədər cərimə var, onların hamısı icraya yönəldilib. Döyülmə olub, həbslər olub. Bütün bunlara baxmayaraq, «Azadlıq» fəaliyyətini davam etdirib, etdirəcək...».


«Azadlıq» qəzeti «Azərbaycan» nəşriyyatının 9-cu mərtəbəsində yerləşir, redaksiyanın 3 otağı var. Keçən il bu vaxtlardı. 1 saylı İqtisad Məhkəməsinin qərarı ilə «Azadlıq» qəzeti «Xaqani küçəsi 33» ünvandan nəşriyyata, bu 3 otağa köçürüldü. Təmirsiz üç otaqdan birində Qənimət Zahidin oturduğu stol boşdur.


Baş redaktorun otaq yoldaşı Pərviz Cəbrayıl: «Qənimət bəy burada bəlkə də, işlərə ən az müdaxilə edən adam idi. Amma Qənimət bəyin olmaması sırf ruhi baxımdan, adamda nəyinsə çatışmadığını hiss etdirir. Hətta o, birinci gün həbs olunanda, mən səhərədək yuxuda Qənimət bəyi gördüm. Həmin idman formasında bizimlə oturub, nəsə söhbət etmək istəyirdi...».


«Azadlıq» qəzetinin sabahkı sayı da daha çox Qənimət Zahid haqqındakı yazılarla, fotoşəkillərlə, «Qənimət Zahidə azadlıq!» manşeti ilə çıxacaq.


Qəzetin məsul katibi Elşən Şirinov deyir ki, «Azadlıq»ın bu cür çapı baş redaktor azadlığa çıxana qədər davam edəcək…


Günün bütün mövzuları

XS
SM
MD
LG