Noyabrın 7-si təxminən saat 15.30-da «Azərbaycan» dövlət nəşriyyatının qarşısında «Azadlıq» qəzetinin baş redaktoru Qənimət Zahid hücuma məruz qalıb.
«Bir qadın nəşriyyatın qabağında telefonla danışırdı. Mən onun yanından keçib içəri daxil olmaq istəyəndə məni söyməyə başladı. Əvvəlcə heç nə başa düşmədim»-, Qənimət Zahid belə deyir.
Baş redaktor qadına onu kiminləsə səhv saldığını anlatmaq istəyib.
«Bu vaxt gənc oğlan yüyürərək mənə yaxınlaşdı. Məni vurmağa cəhd etdi. Gördüm ki, məni döymək istəyirlər. Müqavimət göstərdim. Pencəyim cırıldı…».
Qənimət Zahid deyir ki, hadisə vaxtı tanımadığı bir nəfər onun qolundan tutub hadisə yerindən uzaqlaşdırıb.
Baş redaktor baş vermiş hadisəni təxribat adlandırıb.
Qənimət Zahid iş yerinə həbsxanada olan qardaşı Mirzə Sakitə baş çəkməkdən gəlirmiş.
Xəqani-33 ünvanından çıxarıldıqdan sonra «Azadlıq» qəzetinin redaksiyası «Azərbaycan» nəşriyyatında yerləşir.