«Eynulla Fətullayevin həbsi jurnalistikanı cinayət məsuliyyətli sahələrə çevirmək və tənqidi fikirləri susdurmaq üçün repressiv qanunlardan özbaşına istifadədə dərsliyə düşə biləsi bir nümunədir».
ATƏT-in media azadlığı üzrə nümayəndəsi Mikloş Haraşti «Azadlıq» radiosuna müsahibəsində «Gündəlik Azərbaycan» və «Realnı Azerbaydjan» qəzetlərinin təsisçi və baş redaktoru Eynulla Fətullayevə 8 il 6 ay həbs cəzası verilməsini şərh edərkən belə deyib: «Bu praktika ATƏT qarşısında mətbuat azadlığı sahəsində öhdəliklərin ciddi pozulmasıdır. Demokratiya üçün hakimiyyətin təmkinli olması və ATƏT üzvü kimi ölkədə hələ qalmaqda olan azad mətbuatın təqibini dayandırması çox vacibdir».
Oktyabrın 30-da Ağır Cinayətlərə Dair İşlər üzrə Məhkəmədə E.Fətullayev terrora çağırış, milli ədavəti qızışdırmaq və vergidən yayınmada təqsrkar bilinərək 8 il 6 ay müddətinə azadlıqdan məhrum edilib.
Bir sıra beynəlxalq təşkilatlar jurnalistin həbsini pisləyib.