Oktyabrın 29-da Bakıdakı ABŞ və Böyük Britaniya səfirlikləri fəaliyyətlərini məhdudlaşdırıblar. Hər iki səfirlikdən bunun səbəbini təhlükəsizliklə izah edirlər.
ABŞ səfirliyinin əməkdaşı Conatan Henik «Azadlıq» radiosuna deyib ki, səfirliyin bəzi xidmətləri fəaliyyətini dondurub: «Mən sizə ətraflı məlumat verə bilmərəm. Yaxın günlərdə ətraflı bilgi verilə bilər. Əsasən viza xidmətləri, insanlara açıq xidmətlər məhdudlaşdırılıb. Biz təhlükəsizliklə bağlı məlumatı Bakıdakı Amerika vətəndaşlarına da çatdırmışıq».
Oktyabrın 29-u axşam Amerika səfirinin iştirakıyla keçirilməli olan tədbir də təxirə salınıb.
Böyük Britaniyanın Bakıdakı səfirliyindən də «Azadlıq» radiosuna deyiblər ki, təhlükəsizlik səbəblərindən bu gün səfirliyin işi məhdudlaşdırılıb.