Ermənilərin soyqırım iddiası ilə bağlı qətnaməni dəstəkləyən amerikalı konqresmenlər istəyirlər ki, sənədin səsverməsi uzansın. Onlar sənədin Konqresdə ya ilin axırında, ya da ki gələn il səsverməyə qoyulmasını təklif edirlər. Qətnamənin dörd əsas təşəbbüskarı olan deputatlar Nümayəndələr Palatasının sədri Nensi Pelosiya bu barədə məktub yazıblar.
Sözügedən qətnamə ABŞ Konqresinin Nümayəndələr Palatasının Xarici Əlaqələr Komitəsində oktyabrın 10-da qəbul olunub. Qətnamədə deyilir ki, 1915-17-ci illərdə Osmanlı İmperiyası ermənilərə qarşı soyqırım həyata keçirib.
Sonradan parlamentarilərin 17-si qətnamədəki imzalarını geri alıb.
Türkiyə bu iddiaları əsassız hesab edir. Corc Buş administrasiyası qətnamənin ABŞ-ın milli maraqlarına zərər verəcəyi üçün Konqres üzvlərini onun əleyhinə səs verməyə çağırır.
