Beynəlxalq söz azadlığını müdafiə təşkilatı «Sərhədsiz reportyorlar» Azərbaycan hakimiyyətini məhkum edilmiş jurnalistləri Ramazan bayramı münasibətilə azad etməyə çağırıb. Bu haqda «Turan» agentliyi məlumat yayıb. «Dözümlülük və rəhm nümayiş etdirməyin lazım olduğu bayramla əlaqədar Azərbaycan hakimiyyətini mərhəmət göstərməyə və hazırda həbsxanada olan məhkum edilmiş bütün yeddi jurnalisti azad etməyə çağırırıq», - deyə təşkilatın bəyanatında bildirilir.
Təşkilat bəyan edir ki, onlar və ATƏT dəfələrlə Azərbaycanı jurnalistlərə qarşı zorakılığa görə tənqid edib: «Ölkə insan hüquqlarına hörmət etmək öhdəliyi götürüb, lakin hələ də bir şey etməyib. İndi vəziyyəti yaxşılaşdırmaq və müstəqil KİV-lərə qarşı daimi təzyiqlərə son qoymaq üçün məqamdır. İnsanların öz evlərində toplaşdığı və orucluğun başa çatmasını qeyd etdiyi Ramazan bayramı ilə əlaqədar bizim fikirlərimiz bu bayramı ailələrindən uzaqda keçirəcək həmin yeddi jurnalistlə birlikdədir. Jurnalistlər böhtan və təhqir ittihamları ilə məhkum ediliblər. Bu ittihamların Cinayət Məcəlləsindən çıxarılması olduqca vacibdir, çünki onlar daima müxalif KİV-ləri susdurmaq üçün istifadə olunur».
Hazırda Azərbaycan həbsxanalarında yeddi jurnalist cəza çəkir. Onların hamısı iki ildən beş ilədək azadlıqdan məhrum ediliblər.
