Rusiyanın Kollektiv Təhlükəsizlik Müqaviləsi Təşkilatı (KTMT) çərçivəsində Ermənistana silah satışı şərtlərini asanlaşdırması Azərbaycanı narahat edir. Bakı Moskvanı diqqətli olmağa və taktiki addımları ilə işğalçını gücləndirməməyə çağırır.
Bunu Xarici İşlər Nazirliyinin mətbuat katibi Xəzər İbrahim oktyabrın 8-də keçirdiyi ənənəvi mətbuat konfransında bildirib.
Ötən həftə Düşənbədə keçirilən KTMT-yə üzv ölkələrin dövlət başçılarının sammitində Rusiyanın bu təşkilatda təmsil olunan müttəfiqlərinə silahı öz daxili qiymətləri ilə satacağı barədə qərar qəbul olunub.
Xəzər İbrahim deyir ki, bu qərar çoxtərəfli diplomatiya və KTMT-nin mahiyyəti baxımından başa düşülə bilər, amma nəzərə alındıqda ki, Rusiya ATƏT-in Minsk qrupuna həmsədrlik edir və Ermənistan da Azərbaycanın torpaqlarını işğal edib, o zaman Moskva bütün həssas məqamları nəzərə almalıdır: «Beynəlxalq hüquq və regiondakı siyasi vəziyyəti nəzərə alaraq Rusiya diqqətli olmalıdır. Azərbaycan bu mövqeyini Moskvanın diqqətinə çatdıracaq».
Buna baxmayaraq, Bakı KTMT-nin möhkəmlənməsini və ötən həftə bu qurumla Şanxay Əməkdaşlıq Təşkilatı arasında imzalanmış əməkdaşlıq müqaviləsini alqışlayır. X.İbrahimin sözlərinə görə, Azərbaycan bu blokların heç birinə qoşulmasa da, onların qarşıdurmasında maraqlı deyil. «Biz NATO-ya da üzvlük üçün müraciət etməmişik. Amma o demək deyil ki, Azərbaycan öz təhlükəsizliyini qoruya bilməyəcək».