Dövlət Duması Viktor Zubkovu Baş nazir vəzifəsinə təsdiq edib. Onun namizədliyini 381 deputat müdafiə edib. 47 deputat əleyhinə səs verib, 8 nəfər isə bitərəf qalıb.
Zubkov 1992-ci ildən bəri müasir Rusiyanın tarixində Nazirlər Kabinetinə başçılıq edən doqquzuncu rəhbərdir.
Sentyabrın 12-də Rusiyanın Baş naziri Mixail Fradkov istefa verib.Prezident Vladimir Putin onun yerinə Viktor Zubkovun namizədliyini irəli sürüb.
Viktor Zubkov 1941-ci il sentyabrın 15-də Rusiyanın Sverdlovsk vilayətində doğulub. 1965-ci ildə Leninqrad Kənd Təsərrüfatı İnstitutunun iqtisadiyyat fakültəsini bitirib. 30 ildən çox Leninqrad vilayətində müxtəlif rəhbər vəzifələrdə çalışıb. 1999-cu ildə Vladimir Putin Rusiya prezidenti seçiləndə Moskvaya təyinat alıb. 2001-ci ildən Federal Maliyyə Monitorinqi Xidmətinin (Maliyyə Kəşfiyyatı) rəhbəri olub.