Avqustun 21-nə keçən gecə Tbilisi meriyasının Nəzarət Xidmətinin və İqtisadiyyat Nazirliyinin əməkdaşları «Literaturnaya Qruziya» qəzetinin redaksiyasını, Gürcüstan Xalq Cəbhəsinin qərargahını, Milli İstiqlal Partiyasının bürosunu, həmçinin Yazıçılar Birliyini Tbilisinin mərkəzindəki binadan çıxarıblar.
Hakimiyyət bəyan edir ki, bütün bu qurumlar dövlət mülkiyyətində olan və özəlləşdirməyə çıxarılacaq binanı zəbt ediblər.
Gürcüstan Xalq Cəbhəsinin rəhbəri professor Nodar Natadze köçürməni qanunsuz saydığını və bundan Avropa İnsan Haqları Məhkəməsinə şikayət verəcəyini bildirib.
Yazıçılar Birliyinin İdarə Heyətinin sədri Makvala Qonaşvili də yardım üçün beynəlxalq təşkilatlara müraciət etmək niyyətindədir. «Yazıçılar Birliyinin bütün əmlakı küçəyə atılıb. Dahi klassiklərimizin portretləri binanın pilləkənlərində, ayaqlar altındadır», - deyə Qonaşvili «Azadlıq» radiosuna bildirib.
