Gələn həftə Azərbaycan Beynəlxalq Bankı Bakı-Tbilisi-Qars dəmiryolu xəttinin yenidən qurulmasını həyata keçirən Gürcüstandakı operator şirkətin hesabına ilkin vəsaiti ödəyəcək.
Bunu «Azadlıq» radiosuna Beynəlxalq Bankın rəsmisi Rauf Ağayev deyib. Onun sözlərinə görə, ilkin vəsaitin köçürülməsi avqustun 25-ə qədər yekunlaşmalıdır. Rauf Ağayev həmin vəsaitin nə qədər olması barədə məlumat verməyib. Bəzi yerli KİV ilkin kreditin 40 milyon dollar civarında olacağını yazır.
Azərbaycan prezidentinin sərəncamıyla Bakı-Tbilisi-Qars dəmiryolu xəttinin Gürcüstan hissəsinin yenidən qurulması üçün Dövlət Neft Fondundan 220 milyon manat vəsait ayrılıb. Bu vəsait Azərbaycan Beynəlxalq Bankı vasitəsilə Gürcüstanda yenidənqurma işlərini aparan təşkilata 1 faizlə 25 illiyə verilir.
Bütövlükdə Azərbaycan, Gürcüstan və Türkiyə ərazisindən keçən dəmiryolu xəttinin yenidən qurulmasına 420 milyon dollar vəsaitin xərclənməsi nəzərdə tutulub. Layihənin 2008-ci ilin sonuna qədər başa çatdırılması planlaşdırılır.