Avqustun 6-da «Bizim yol» qəzetinin əməkdaşı Müşfiq Hüseynova istintaq qrupu təqdim olunacaq. Bu barədə «Azadlıq» radiosuna məlumat verən Müşfiq Hüseynovun vəkili Vüqar Xasıyevin sözlərinə görə, hələlik onlar istintaq qrupunda kimlərin təmsil olunacağını bilmədiklərindən yalnız tanışlıqdan sonra öz münasibətlərini açıqlayacaqlar.
«Bizim yol» qəzetinin baş redaktoru Bahəddin Həziyev mətbuata Müşfiq Hüseynovun işiylə bağlı ikinci jurnalistin də həbs oluna biləcəyi ehtimalını səsləndirib. Bahəddin Həziyev bu ehtimalını Milli Təhlükəsizdik Nazirliyinin yaydığı əməliyyat çəkilişində Əmək və Əhalinin Sosial Müdafiəsi Nazirliyinin əməkdaşı Rizvan Əliyevin «danışdığımız kimi 1000 dollar ona çatacaq» ifadəsiylə əsaslandırıb. Bahəddin Həziyevin fikrincə, bu jurnalist «Bizim yol» qəzetinin əməkdaşı olmaya da bilər.
Vəkil Vüqar Xasıyev isə deyir ki, Müşfiq Hüseynov hələlik ifadəsində heç bir jurnalistin adını açıqlamayıb.
Ötən ay Müşfiq Hüseynov 3 ay azadlıqdan məhrum edilib. O, rüşvət almaqda ittiham edilir. Jurnalist özü isə bu ittihamları rədd edir. Vəkil deyir ki, Müşfiq Hüseynov avqustun 1-də də istintaqa verdiyi ifadəsində də ona qarşı irəli sürülən ittihamı böhtan adlandırıb.