Albaniya hökuməti «Meiko» şirkətinə Ermənistana silah göndərməyə icazə verməyib. Albaniyanın Xarici İşlər naziri Lulzim Başa iyulun 31-də telefonla azərbaycanlı həmkarı Elmar Məmmədyarova belə deyib. Cənab Başa Məmmədyarovu əmin edib ki, artıq müqavilə ləğv olunub və silahlar Ermənistana göndərilməyəcək.
Azərbaycan Xarici İşlər Nazirliyindən «Azadlıq» radiosuna bildiriblər ki, alban nazirinin cavabı artıq Bakını qane edir.
Lulzim Başa telefon söhbəti zamanı həmçinin bildirib ki, Albaniya-Azərbaycan münasibətlərini bütün sahələrdə və iki ölkənin üzv olduğu təşkilatlar çərçivəsində çox vacib və çoxşaxəli sayırlar.
Bir neçə gün əvvəl Türkiyə mənbələri ölkə ərazisindən Ermənistan üçün nəzərdə tutulmuş silah və hərbi sursatla dolu 60 konteynerin tranzitinin dayandırıldığı barədə məlumat yaymışdılar. Albaniyadan göndərilən bu silah və sursat İstanbul limanından geri qaytarılmışdı. Bu hadisə rəsmi Bakının narahatlığına səbəb olmuşdu.