Türkiyə birtərəfli şəkildə türkdilli ölkələrlə viza rejimini ləğv etməyə hazırlaşır. İstanbulda nəşr olunan «Zaman» qəzetinin verdiyi məlumata görə, Türkiyənin xarici işlər naziri Abdulla Gül bəyan edib ki, müvafiq qərar artıq hazırlanıb və ölkə prezidentinin təsdiqinə təqdim olunmağa hazırdır. Məlumatı «Trend» yayıb.
Qərar qüvvəyə mindikdən sonra Azərbaycan, Qazaxıstan, Qırğızıstan, Türkmənistan və Özbəkistan kimi türkdilli dövlətlərin vətəndaşları Türkiyəyə sərbəst şəkildə səfər edə biləcəklər.
Türkiyə xarici işlər nazirinin verdiyi məlumata görə, bu məsələ bir ay bundan öncə adıçəkilən dövlətlərin səfirləri ilə birlikdə Türkiyədə müzakirə olunub. Gül qeyd edib ki, Gürcüstan, Səudiyyə Ərəbistanı və Küveytin vətəndaşlarına münasibətdə vizasız rejim mövcuddur. «Türkiyə bütün müsəlman və türklər üçün ikinci evə çevriləcək» - deyə Gül əlavə edib.
Siyasi ekspert Qabil Hüseynli «Azadlıq» radiosuna Türkiyənin viza rejimini ləğv etmək təşəbbüsünü şərh edərkən, bunun real olduğunu bildirib. Ekspert deyir ki, bü türkdilli dövlətlər arasında münasibətlərin daha da intensivləşməsinə təkan verəcək.
