«Biz heç nə itirmədik, çünki bu yayım kommersiya xarakteri daşımırdı. Amma Azərbaycanın rusdilli tamaşaçıları itirdilər».
Rusiyanın ORT telekanalının beynəlxalq yayım marketinqi üzrə direktoru Aleksandr Neçayev «Azadlıq» radiosuna sözügedən kanalın Azərbaycanda yayımının dayandırılması ilə bağlı vəziyyəti şərh edərkən bildirib.
Kanal rəhbərliyinin məsələ ilə bağlı artıq press-reliz yaydığını bildirən Neçayev deyir ki, onlar Azərbaycan məmurlarının ORT-nin yayımıyla bağlı məlum qərarına heyfslənirlər. Onun sözlərinə görə, artıq yayımın bərpası üçün televiziyaya tamaşaçı xahişləri ünvanlanır və onlar ümid edirlər ki, bu müraciətlər eşidiləcək.
«ORT-nin Azərbaycanda yayımlanmaqda hansısa marağı varmı» sualının cavabında Aleksandr Neçayev bildirdi ki, bu maraq rus dilində danışanların tələbatını ödəməkdən başqa bir şey deyil: «Biz çox təəssüflənirik ki, Azərbaycan məmurları Azərbaycan tamaşaçılarını bu imkandan məhrum etdilər və onları kanala baxmaq üçün pul ödəmək məcburiyyəti qarşısında qoydular».
Milli Televiziya və Radio Şurasının qərarıyla iyulun 11-dən Rusiyanın OPT kanalının Azərbaycanda yayımı dayandırılıb.