«Turan»ın məlumatına görə, bu barədə Avropa Şurası Nazirlər Komitəsinin sədri, Serbiya prezidenti Boris Tadiç iyulun 2-də Strasburqda Yay Demokratiya Universitetinin açılış mərasimində çıxış edərkən bildirib.
«Serbiya BMT üzvü olan istənilən dövlətin bölünməsi və sabitliyinin pozulmasının əleyhinədir», - deyə o, bildirib. Cənab Tadiçin fikrincə, Kosovonun müstəqilliyi digər bu cür münaqişələr - Qarabağ, Abxaziya, Cənubi Osetiya və s. üçün təhlükəli presedent ola bilər.
Serbiyanın ərazi bütövlüyü naminə çıxış edən Belqrad həmçinin Bosniya və Herseqovinanın, Gürcüstan, Azərbaycan və başqalarının ərazi bütövlüyünü dəstəkləyir.
Bununla yanaşı, Serbiya prezidenti Belqradın Kosovoya geniş muxtariyyət verməyə hazır olduğunu təsdiq edib.
Tadiç ölkəsinin Avropa Birliyinə daxil olmaqda qətiyyətini təsdiq edib. «Biz, ərazi bütövlüyümüzdən imtina etmədən Avropanın bir hissəsi olmaq istəyirik», - deyə o, vurğulayıb.