Məlumatı Ermənistan prezidentinin rəsmi internet-saytı yayıb.
Robert Koçaryan onların təşəbbüsünü alqışlayıb, deyib ki, ünsiyyətin qurulması və beləliklə, iki xalq arasında etimad ab-havasının yaranması Qarabağ münaqişəsinin həllinə yaxşı töhfə olacaq:
«Mövcud reallıqlara baxmayaraq. əməkdaşlıq nöqtələrini tapmaq lazımdır və Yerevan bu prosesə hər vasitə ilə yardım etməyə hazırdır».
Qonaqlar prezidentlə erməni və Azərbaycan ictimaiyyətləri arasında əlaqələrin yaradılmasının zəruriliyindən, bu əlaqələri həyata keçirməyin yollarından danışıblar.
Azərbaycan ziyalıları deyiblər ki, iki xalq arasında dözümlü münasibət yaratmaq üçün yaşlı nəslin nümayəndələri arasında bir vaxtlar olan dostluq və tərəfdaşlıq münasibətlərini bərpa etmək lazımdır. Gənc nəsli də bu əlaqələrin iştirakçısına çevirmək zəruridir.
Koçaryanla görüşdən sonra müştərək heyət Azərbaycan prezidenti İlham Əliyevlə görüşmək üçün Bakıya yollanıb. Buna qədər onları separatçı Dağlıq Qarabağ Respublikasının prezidenti Arkadi Qukasyan da qəbul edib.
Azərbaycanın Xarici İşlər Nazirliyinin Mətbuat Mərkəzinin rəhbəri Xəzər İbrahim də deyir ki, iki ölkə arasında «bu səfərlər inamı möhkəmlətmək məqsədi daşıyır».