İyunun 19-da «Realnı Azerbaydjan» qəzetinin redaktoru Çingiz Sultansoy «Gündəlik Azərbaycan» və «Realnı Azerbaydjan» qəzetlərinin baş redaktoru Eynulla Fətullayev barəsində Cinayət Məcəlləsinin 214-cü maddəsi əsasında açılmış cinayət işi üzrə şahid qismində MTN-in Baş İstintaq İdarəsində ifadə verib.
Çingiz Sultansoy «Media Forum» saytına bildirib ki, müstəntiqlə sual-cavab 2 saat çəkib: «Müstəntiq bir çox suallar verdi. «Realnı»da Rövşən Bağırovun müəllifliyi ilə dərc olunan «Aliyev idyot na voynu» yazısı ilə bağlı yalnız 2 sual verildi. Digər suallar «Realnı»da çalışanlar, qəzetin ştatı, əməkdaşların maaşları barədə oldu».
Jurnalistə deyiblər ki, şahid qismində «Realnı»da çalışan bütün əməkdaşlar nazirliyə sorğu-suala çağırılacaqlar. «Amma indiyə qədər kimin ora çağırıldığını, kimin ifadə verdiyini bilmirəm».
Çingiz Sultansoy MTN-də sorğu-sual zamanı terrorla bağlı ona heç bir sualın verilmədiyini, izahata imza atdığını deyib.
