Mayın 30-u axşam saatlarında Urmiyə Universitetinin məsul şəxsləri Kimya fakültəsinin tələbəsi Mehdi Hacməhəmmədini Universitetin təhlükəsizlik ofisinə çağırıb ETTELAAT əməkdaşlarına təhvil veriblər.
Hacməhəmmədi ötən ilin karikatura qalmaqalında yasaq edilən Azərbaycan dilli «Oyanış» jurnalının baş redaktoru və Universitetin Nəşriyyata Nəzarət Komitəsinin üzvü idi.
2006-cı ilin may ayında Urmiyə Universitetinin minlərlə tələbəsinin etiraz aksiyasından sonra bu təhsil mərkəzinin Azərbaycan türkcəsində olan nəşriyyatı, o cümlədən «Yaşıl» və «Ulus» jurnalları da qadağan edilib.
Urmiyə Universitetinin tələbəsi və Ustad Şəhriyar tələbə ocağının rəhbəri Əkbər Paşayi də mayın 22-də Universitet rəhbərliyi tərəfindən ETTELAAT məmurlarına təhvil verilmişdi.
«Media Forum» saytı bu yaxınlarda azda edilmiş fəallardan birinə istinad edərək hazırda ETTELAAT-ın Urmiyə şöbəsində saxlanan Əkbər Paşainin döyülüb, işgəncələrə məruz qaldığı və istintaq zamanı baş, üz və bel nahiyələrindən ağır xəsarət aldığını bildirir.
Hazırda Urmiyə Universitetinin beş tələbəsi ETTELAAT-ın təcridxanasında saxlanılır.
Bu haqda məlumat verən «Urmu News» xəbər saytı bildirir ki, universitet məsullarının tələbələri bu şəkildə təhlükəsizlik idarəsinə təhvil verməsi qeyri-adi bir hərəkətdir və ölkənin başqa universitetlərində görünməyib.
