Kollektiv hesab edir ki, ofisdən çıxarılmaları hakimiyyətin siyasi göstərişilə həyata keçirilib və məqsəd qəzetlərin fəaliyyətini pozmaqdır. Kollektiv hadisəni qəzetlərin baş redaktoru Eynulla Fətullayevin həbsilə başlayan təzyiqlərin növbəti mərhələsi hesab edir. Bu baxımdan da onlar hakimiyyətdən təzyiqlərin dayandırılmasını tələb edirlər. Bundan başqa, bəyanatda yerli və beynəlxalq təşkilatlardan təzyiq kampaniyasının dayandırılmasında kömək istənilir. Nəşrlərin heyəti fəaliyyətlərini yaxın günlərdə bərpa etməyə çalışacaqlarını da bildirirlər.
Prezident Aparatı İctimai-Siyasi Şöbəsinin müdiri Əli Həsənov məsələyə hər hansı şərh vermək istəməyib.
Mayın 18-də axşam saatlarında Fövqəladə Hallar Nazirliyinin Yanğından Mühafizə İdarəsinin bir qrup əməkdaşı sözügedən qəzetlərin redaksiyasına gələrək ofisdə yanğın təhlükəsizliyi ilə bağlı xeyli problemlərin olduğunu bildiriblər. Mayın 20-də isə həmin problemlərin aradan qaldırılmasıyla bağlı qəzetlərin qapıları möhürlənib.
