Belə bir xəbərdarlıq Türkiyənin «Axşam» qəzetinin 16 may 2007-ci il tarixli sayındadərc olunub. Qəzet yazır ki, 1993-cü ildən Azərbaycan təyyarə akumlyatorlarının modernləşdirilməsilə bağlı Türkiyənin «Avrasya» şirkətinə sifarişlər verirmiş. Şirkət bu sifarişlə bağlı 3 il davamlı olaraq Azərbaycandan vəsait alsa da, 1996-cı ildə şirkətin alacağı 50 min dollar ödənilməyib. İndi həmin 50 min dollarlıq borc faizlə birlikdə 200 min dollara çatıb. Şirkət bu pulun alınmasıyla bağlı Azərbaycan dövlətini məhkəməyə verib. Ankara 16-cı İcra Məhkəməsi isə İstanbul Hava Limanına enən Azərbaycan Hava Yollarına məxsus təyyarəyə həbs qərarı çıxarıb.
Qəzetin yazdığına görə, Azərbaycan tərəfinin etirazlarından sonra işə yenidən baxılıb. Bəzi sənədlərin çatışmadığı əsas göstərilərək məhkəmə əmlaka həbs qoyulması qərarını aradan qaldırıb.
Amma məsələ bununla bitməyib, şirkət yenidən Apellyasiya Məhkəməsinə müraciət edib. Şirkətin vəkili Nesilhan Benlierin bildirdiyinə görə, məhkəmə şirkətin tələbinə uyğun qərar çıxararsa, onda Türkiyəyə uçan və Azərbaycana məxsus təyyarəyə həbs qoyulacaq.
«Azal» Hava Yolları Dövlət Konserni Mətbuat Xidmətinin rəhbəri Məhərrəm Səfərli isə «Azadlıq» radiosuna bildirib ki, şirkət bu barədə hər hansı məlumata malik deyil.