Aprelin 26-da Gürcüstanla sərhəddə Qırmızıkörpü nəzarət-buraxılış məntəqəsində baş vermiş insidentə görə, 10 nəfər saxlanıb. İş araşdırılmaq üçün rayon prokurorluğuna verilib. Bir nəfər barəsində cinayət işi açılıb. Qazax Rayon Polis İdarəsindən «Azadlıq» radiosuna verilən məlumatda belə deyilir.
Aprelin 26-da Türkiyədən gəlmiş kürdəsilli miqrantlar deportasiya edilərkən sərhədçilərlə onlar arasında qarşıdurma yaranmışdı. Nəticədə iki Türkiyə vətəndaşı və üç Azərbaycan əsgəri yaralanmışdı.
Dövlət Sərhəd Xidmətinin rəhbəri Elçin Quliyev mayın 8-də jurnalistlərə deyib ki, son zamanlar Azərbaycanın iqtisadi inkişafı artdığından sərhədi keçmək istəyənlərin sayı artıb: «Bu məsələ dövlətin nəzarətindədir, həmin məqsədlə sərhəddə yeni texniki avadanlıq quraşdırılıb».