Mayın 1-i saat 12-də, Bakının Fəhlə prospektindəki «Bakı fəhləsi» heykəlinin önündə nümayiş keçirilib. Bir sıra solyönümlü partiya və qeyri-hökumət təşkilatlarının təşəbbüsü ilə keçirilən bu nümayiş Dünya Zəhmətkeşlərinin Həmrəylik Gününə həsr edilib.
Neftçilərin Hüquqlarını Müdafiə Komitəsinin həmsədri Mirvari Qəhrəmanlı deyib ki, əslində, zəhmətkeşlərin həmrəylik günü Azərbaycanda da rəsmən qeyd edilməlidir. Onun sözlərinə görə, indi sıravi neftçilər neft pullarının hara xərcləndiyini bilmirlər. Yaxşı olar ki, Azərbaycan neftçiləri bir araya gəlib neft pullarının taleyi ilə maraqlansınlar.
Yazıçı-jurnalist Həmid Herisçi isə deyib ki, indi hökumət çoxlu iş yerlərinin açılmasından danışır. Ancaq onun sözlərinə görə, bu iş yerlərində nə bir işçinin əmək kitabçası var, nə də onların sosial hüquqları qorunur.
H.Herisçi onu da deyib ki, gec-tez Azərbaycanda da sosial hərəkat kütləvi hal alacaq.
Azərbaycan müstəqillik qazandıqdan sonra 1 may bayram kimi rəsmən keçirilmir.
