Aprelin 30-da Bakıda «Şəffaflığın artırılması və korrupsiyaya qarşı Milli Strategiya» üzrə konfrans başlayıb. İki gün davam edəcək konfransda Dövlət Qulluğunu İdarəetmə Şurası yanında Korrupsiyaya Qarşı Mübarizə üzrə işçi qrupun hazırladığı layihə müzakirə edilir. Müzakirələrdə hökumət nümayəndələri, beynəlxalq və yerli ekspertlər iştirak edirlər.
2007-2010-cu əhatə edən Milli Strategiyada Azərbaycanda korrupsiyanın azaldılması, qanunvericiliyin təkmilləşdirilməsi, dövlət orqanlarının fəaliyyətinin təkmilləşdirilməsi və ümumilikdə şəffaflığın artırılması sahəsində 184 tədbir həyata keçirilməsi planlaşdırılır.
Layihə müəllifləri hesab edir ki, korrupsiyaya qarşı mübarizə üzrə 2004-2006-cı illərdə həyata keçirilən dövlət proqramı çərçivəsində nəzərdə tutulan əsas tədbirlər həyata keçsə də, korrupsiyaya qarşı mübarizənin davam etdirilməsinə ehtiyac var. Üç ili əhatə edən Milli Strategiya korrupsiyaya şərait yaradan halların aradan qaldırılmasını, qanunların effektiv, ədalətli şəkildə tətbiq edilməsini, antikorrupsiya mədəniyyətinin formalaşmasına yardım edəcək mühitin möhkəmləndirilməsinə yönələn islahatları nəzərdə tutur.