İctimai nəqliyyatı idarə edən sürücülərin gündəlik tibbi müayinədən keçməsində ciddi problemlər var. Nəqliyyat Nazirliyi Mətbuat Xidmətinin rəhbəri Namiq Həsənov deyir ki, indi heç bir sürücü tibbi müayinədən keçirilmir. Onun sözlərinə görə, ötən il bununla bağlı verilən qərarın birinci hissəsində maşınların hər gün texniki baxışdan, ikinci bəndində isə sürücülərin tibbi müayinədən keçməsi tələbi qoyulub.
Məntəqələrin sayı az olduğundan Nəqliyyat Nazirliyi texniki baxışla bağlı xeyli problemlərlə üzləşir və bu işi tam həyata keçirə bilmir. Namiq Həsənov deyir ki, sürücülərin tibbi müayinədən Səhiyyə Nazirliyinin əməkdaşları keçirməlidirlər. Səhiyyə Nazirliyindən isə bu barədə məlumat almaq mümkün olmadı.
