Aprelin 9-da Yasamal Rayon Məhkəməsində Qaçqın və Məcburi Köçkünlərin Hüquqlarını Müdafiə Mərkəzinin rəhbəri Tatyana Çaladzenin «Gündəlik Azərbaycan» və «Realnıy Azerbaydjan» qəzetlərinin təsisçi və baş redaktoru Eynulla Fətullayevə qarşı xüsusi ittiham qaydasında irəli sürdüyü iddianın hazırlıq iclası olub.
Fətullayevin vəkili İsaxan Aşurov iddia ərizəsinin düzgün tərtib edilmədiyini əsas gətirərək, onun geri qaytarılması barədə vəsatət qaldırıb. Vəsatət baxılmamış saxlanıb.
İddiaçı Çaladze isə məhkəmədən tərcüməçi ilə təmin olunmasını xahiş edib.
Proses aprelin 11-də davam edəcək.
Aprelin 6-da Tatyana Çaladze Eynulla Fətullayevə qarşı Yasamal Rayon Məhkəməsində xüsusi ittiham qaydasında iddia qaldırıb. İddiaçı jurnalist barədə Cinayət Məcəlləsinin 147-ci maddəsi ilə cinayət işi başlanmasını və onun məsuliyyətə cəlb olunmasını tələb edir.
Yasamal Rayon Məhkəməsinin aprelin 6-da Çaladzenin Fətullayevə qarşı digər idiası - şərəf, ləyaqət və işgüzar nüfuza xələl vurma üzrə çıxardığı qərarla baş redaktor və onun onun sahibi olduğu qəzetlər 20 min manat cərimə olunub.
Qaçqın və Məcburi Köçkünlərin Hüquqlarını Müdafiə Mərkəzinin rəhbəri Tatyana Çaladze «Gündəlik Azərbaycan» və «Realnıy Azerbaydjan» qəzetlərinin təsisçi və baş redaktoru Eynulla Fətullayevin Xocalı faciəsi qurbanlarını təhqir etdiyini iddia edir. Fətullayev isə bunu hakimiyyətin sifarişi kimi qiymətləndirir.