Rəsmi IRNA agentliyinin məlumatına əsasən, Britaniya dənizçiləri Londona aprelin 5-i yerli vaxtla səhər saat 8-də uçacaqlar.
Dənizçiləri azad etmək qərarını prezident Mahmud Əhmədinejad aprelin 4-də, yerli və əcnəbi müxbirlər üçün Tehranda keçirdiyi mətbuat konfransında elan edib.
Əhmədinejad qeyd edib ki, Böyük Britaniya ilə «heç bir sövdələşmə olmayıb, onların azad olunması iranlıların Britaniya xalqına hədiyyəsi» kimi qiymətləndirilməlidir: «Biz onları əfv etməyi qərara almışıq».
Mətbuat konfransından sonra İran prezidenti britaniyalı dənizçilərlə görüş keçirib.
Martın 23-də İran tərəfi 15 Britaniya dənizçisinin su sərhədini pozduğunu iddia edərək, onları həbsə alıb. Böyük Britaniya isə bəyan edib ki, onun hərbçiləri İraq sularında saxlanıblar.
İran prezidenti Britaniya dənizçilərini tutan hərbçiləri medallarla təltif edib.
