Azərbaycan hakimiyyəti hələ də sərbəst toplaşmaq azadlığını məhdudlaşdırır, şəhərin mərkəzində kütləvi toplantılar keçirməyə icazə vermir. İnsan Haqları üzrə Beynəlxalq Helsinki Federasiyasının illik hesabatında belə deyilir. Qurum ATƏT-in 56 üzvü olan ölkədə insan haqlarının vəziyyətini araşdırıb. Hesabat martın 27-də Moskvada təqdim olunacaq. Sənəddə xüsusilə Orta Asiya, Şimali Qafqaz və Belarusdakı vəziyyətə diqqət çəkilir.
İnsan Haqları üzrə Beynəlxalq Helsinki Federasiyası bildirir ki, Azərbaycanda azad mətbuatın vəziyyəti pisləşməkdə davam edir. Azad mətbuatı ya müvəqqəti, ya da birdəfəlik bağlayırlar, jurnalistləri isə həbs edirlər.
Azərbaycanın hakimiyyət təmsilçiləri adətən bildirirlər ki, ölkədə söz və mətbuat azadlığı var. Toplantılar keçirmək üçünsə Bakı Şəhər İcra Hakimiyyəti müəyyən yerlər ayırıb.
