Sabiq İqtisadi İnkişaf naziri Fərhad Əliyev və onun qardaşı, «Azpetrol» şirkətinin keçmiş prezidenti Rafiq Əliyevin barəsində başlanmış cinayət işinin istintaqı yekunlaşıb, materiallar tanışlıq üçün müdafiə tərəfinə təqdim edilib. Sabiq nazirə Cinayət Məcəlləsinin mənimsəmə və israfetmə, vəzifə saxtakarlığı, rüşvət alma, qardaşına isə vergi ödəməkdən yayınma və qaçaqmalçılıq maddəsi ilə ittiham irəli sürülüb. Bu barədə APA-ya açıqlamasında Baş Prokurorluğun İctimaiyyətlə Əlaqələr Şöbəsinin rəisi Eldar Əfəndiyev məlumat verib. Cənab Əfəndiyevin sözlərinə görə, Əliyev qardaşlarına qarşı dövlət çevrilişi və kütləvi iğtişaşlar hazırlanmasına ilə bağlı elan olunan ittihamlar qüvvəsində qalır, bu ittihamlar ayrıca icraata götürülüb: «Bu ittihamlarla bağlı müəyyən istintaq əməliyyatları aparılmalı, şahidlər dindirilməlidir. Bu kimi məsələlərə görə, işi başa çatdırmaq mümkün olmayıb. Korrupsiya halları ilə bağlı işə məhkəmədə baxıldıqdan sonra dövlət çevrilişi və kütləvi iğtişaşlar hazırlamağa görə verilən ittihamlarla bağlı iş məhkəməyə göndəriləcək».
Fərhad Əliyev dövlət çevrilişinə cəhd ittihamı ilə 2005-ci ildə həbs olunub.
