Serbiya nümayəndələri və Kosovonun alban rəhbərliyi arasında Vyanada keçirilən danışıqlar başa çatıb.
BMT Baş katibinin xüsusi nümayəndəsi Martti Ahtisaari deyib ki, «tərəflər kompromisə iradə nümayiş etdirməyiblər», əvvəlki bir-birinə tam zidd mövqelərində qalıblar.
BMT nümayəndəsinin fikrincə, «Vyanada danışıqlar potensialı tükənib».
«Mən öz planımı BMT Təhlükəsizlik Şurasının müzakirəsinə verirəm» - deyə o, bildirib.
Sənəd Təhlükəsizlik Şurasına martın sonunda təqdim olunacaq.
Serbiya Kosovonun gələcək statusuna dair Ahtisaarinin təqdim etdiyi planı qəbuledilməz adlandırıb. Kosovo rəhbərliyi ümumilikdə planı alqışlasa da, bildirib ki, son məqsəd diyarın tam müstəqilliyi olmalıdır.
BMT planı Kosovoya müstəqilliyin bir çox atributlarını versə də, müstəqilliyi rəsmən elan etmir.