Azərbaycan xarici işlər nazirinin müavini Xələf Xələfov deyib ki, İran tərəfi bu ölkəyə məxsus vertolyotların Azərbaycanın hava sərhədlərini pozması ilə bağlı üzrxahlıq edib. APA xəbər verir ki, nazir müavini İranda səfərdə olarkən vertolyotların Azərbaycanın hava sərhədini pozması barədə etirazını bu ölkənin müvafiq qurumlarına çatdırıb: «İranlı həmkarımla görüşdə bu məsələni müzakirə etdik. Onlar bunun bilərəkdən yox, təsadüfən olduğunu deyərək, üzrxahlıq etdilər. Biz də hesab edirik ki, İran vertolyotlarının Azərbaycan sərhədlərini pozması bilərəkdən edilməyib».
Fevralın 22-də İran vertolyotları Astara istiqamətində Azərbaycanın hava məkanını pozub. Dövlət Sərhəd Xidmətinin rəhbəri Elçin Quliyev İran tərəfinin bu addımı razılaşdırmadığını bildirib.