«Sənət» qəzetinin baş redaktoru Samir Sədaqətoğlu və yazıçı-publisist Rafiq Tağının məhkəməsi təxirə salındı. Onların işinə Nəsimi yox, Səbayel Rayon Məhkəməsi baxacaq.
Nəsimi Rayon Məhkəməsinin martın 5-də keçirilən iclasında hakim Məhəmməd Zülfüqarlı bildirib ki, «Sənət» qəzetinin redaksiyası Səbayel rayonu ərazisində yerləşdiyindən işə də həmin rayon məhkəməsi baxmalıdır. Buna görə də hakim işin Səbayel Rayon Məhkəməsinə göndərilməsi haqda qərar qəbul etdi.
Təqsirləndirilən şəxslərin vəkili isə dörd ay ərzində məhkəmə iclasının harada keçirilməsi ilə bağlı qərarın verilməməsini qanun pozuntusu adlandırıb.
Jurnalistləri müdafiə məqsədi ilə məhkəməyə bir sıra yazıçılar da gəlib. Şair Baba Vəziroğlu deyib ki, Rafiq Tağı və Samir Sədaqətoğlunun həbsi ilə Azərbaycanda söz və fikir azadlığı pozulub.
Yazıçı-publisist Rafiq Tağı, «Sənət» qəzetinin baş redaktoru Samir Sədaqətoğlu ötən ilin noyabrda həbs ediliblər. Həbsə səbəb həmin qəzetdə Rafiq Tağının «Avropa və biz» yazısı olub. Jurnalistlər milli, dini və irqi ədavəti qızışdırmaqda ittiham olunurlar.