Fevralın 28-də bir qrup adam «Realnıy Azərbaydjan» və «Gündəlik Azərbaycan» qəzetlərinin redaksiyası qarşısında etiraz aksiyası keçirib. Aksiyaçılar sözügedən nəşrlərin baş redaktoru və təsisçisi Eynulla Fətullayevin ölkədən çıxarılması ilə bağlı şüarlar səsləndiriblər. Bundan başqa, redaksiyanın pəncərələri yumurta atəşinə tutulub.
«Gündəlik Azərbaycan» qəzetinin şef redaktoru Şahvələd Çobanoğlunun «Azadlıq» radiosuna verdiyi məlumata görə, əsasən, qadın və uşaqlardan ibarət olan həmin adamlar Xocalı qaçqınları olduqlarını bildiriblər: «Aksiyaçılar piketi Eynulla Fətullayevin vaxtilə yazdığı məqalələrdən birində Xocalı faciəsinin guya azərbaycanlılar tərəfindən törədilməsilə bağlı fikirləri ilə əsaslandırıblar».
Cənab Çobanoğlu deyir ki, bu məsələ ilə bağlı Eynulla Fətullayev dəfələrlə bəyanat yayaraq, heç yerdə belə bir fikir söyləmədiyini deyib.
Şahvələd Çobanoğlu bildirir ki, Yasamal Rayonu 27-ci Polis Bölməsinə edilən müraciətdən sonra həmin adamlar aksiyanın qətnaməsini oxuyub, redaksiyadan uzaqlaşıblar.
Şef redaktorun sözlərinə görə, onlara edilən hücum və təzyiqlər əslində, sözügedən qəzetlərdə müxtəlif məmurlar haqqında yazılan məqalələrlə bağlıdır.
«Realnıy Azərbaydjan» və «Gündəlik Azərbaycan» qəzetlərinin redaksiyası qarşısında oxşar aksiya ötən həftə də keçirilmişdi.
