Fevralın 22-də səhər saatlarında İran hərbi hava qüvvələrinə məxsus vertolyotlar Azərbaycan hava məkanını keçərək bir müddət Astara şəhəri üzərində uçublar. Bu haqda «Azadlıq» radiosuna Astara şəhər sakini Asəm Hacıyev məlumat verib. Onun sözlərinə görə, Azərbaycan hərbi hava qüvvələrinə aid olmayan vertolyotların şəhər icra hakimiyyəti və başqa hökumət idarələrinin üzərindən uçuşu astaralıları təşvişə salıb.
«Camaat vahimə içində idi. Onlar İranla Azərbaycan arasında müharibənin başlanmasından qorxurdular. Çox alçaq məsafədən uçurdular. 150-200 m ancaq olardı».
İranın Azərbaycandakı səfirliyindənsə bildirirlər ki, bu uçuş əvvəlcədən Azərbaycan tərəfi ilə razılaşdırılıbmış. Həmin vertolyotlar hərbi qüvvələrə aid deyil və İranın əyalətində səfərdə olan prezidenti müşayiət edirmiş. Mətbuat katibi Məcid Feyzullahi bildirir ki, vertolyotlar sərhədi keçməyiblər.
Asəm Həşimli də deyir ki, vertolyotların uçuşu zamanı rəsmilərdən bunun əvvəlcədən razılaşdırlıdığını bildirənlər olub. Ancaq, Müdafiə Nazirliyi bu məlumatı təkzib edir.
Bir neçə il öncə də İran tərəf Azərbaycanın hava və su sərhədini pozmuşdu.
