«Bu gün biz saxta dünyada yaşayırıq. Hər şey saxtadır. Masanın üstündə gördüyünüz eynək, qələm, hamısı…» Bu fikirləri fevralın 8-də Bakıda başlayan «Saxta dərmanlara qarşı mübarizə» adlı beynəlxalq konfransla bağlı keçirdiyi mətbuat konfransında Ümumdünya Gömrük Komitəsinin (ÜGT) baş katibi Mişel Dane deyib. Onun sözlərinə görə, uşaqlar üçün hazırlanan saxta ana südündən tutmuş, vaksinlərə qədər müxtəlif dərmanlar yüzlərlə körpənin ölümünə səbəb olub.
Cənab Danenin sözlərinə görə, dünyada ən çox saxta dərmanlar Çin və Hindistanda istehsal olunur. O, saxta dərmanlara qarşı mübarizəni terrorizm və narkotik maddələrə qarşı mübarizə ilə eyni səviyyədə tutur.
Saxta dərmanlarla bağlı Azərbaycanda vəziyyətin necə olmasına gəlincə, Mişel Dane bu barədə konkret məlumatlara malik olmadığını bildirir.
Azərbaycan Dövlət Gömrük Komitəsinin sədri Aydın Əliyev isə deyir ki, 2000-ci ildən indiyə qədər qaçaqmalçılıq yolu ilə ölkəyə gətirilən iki milyona yaxın müxtəlif ampula və qutudan çox dərman preparatları saxlanılaraq məhv edilib.
Tədbir fevralın 9-da davam edəcək.