2007-ci ildə Dövlət Neft Fondunun vəsaitlərindən qaçqın və məcburi köçkünlərin mənzil və kommunal şəraitinin yaxşılaşdırılması üçün 124 milyon manat ayrılıb. Bunu yanvarın 30-da mətbuat konfransı keçirən Neft Fondunun icraçı direktoru Şahmar Mövsümov deyib. Onun sözlərinə görə, bu il fondun vəsaitləri hesabına Oğuz-Qəbələ zonasından Bakıya su kəmərinin çəkilməsi və Samur-Abşeron suvarma sisteminin yenidən qurulması işləri davam etdiriləcək.
Cənab Mösvümov bildirdi ki, 2007-ci il yanvarın 1-nə fondun aktivləri 1 milyard 268 milyon manata yaxın olub. İcraçı direktorun sözlərinə görə, 2006-cı il ərzində fondun büdcə gəliri təqribən 985, büdcə xərcləri isə 981 milyon manat təşkil edib: «Ötən il də fondun müəyyən xərcləri qaçqın və məcburi köçkünlərin problemlərinə yönəlib. Bu məbləğ təqribən 110 milyon manata yaxındır». Bundan başqa Oğuz-Qəbələ zonasından Bakıya su çəkilişlərinə 82 milyon, Samur-Abşeron suvarma sisteminin yaxşılaşdırılmasına 37 milyon manat xərclənib.
