Yanvarın 30-da Bakıda Təzəpir, Cümə, Əjdər bəy və bir sıra məscidlərdə, ziyarətgahlarda qanvermə kampaniyası keçiriləcək. Bu barədə «Azadlıq» radiosuna Qafqaz Müsəlmanları Ruhani İdarəsinin mətbuat xidmətinin rəhbəri Hacı Akif Ağayev deyib. Hacı Akif Ağayev bildirir ki, hər il «Aşura Günü»ndə talasimeyalı və qana ehtiyacı olan başqa xəstələr üçün belə kampaniyalar təşkil olunur.
Ruhani İdarəsi möminlərə müraciət edərək, aşura mərasimlərində onları bədəndən qan çıxarmaqla müşahidə olunan-zəncir döymə və başqa hərəkətlərdən çəkinməyə çağırıb. Hacı Akif Ağayev azyaşlı uşaqların belə mərasimlərdə iştirakının arzu edilmədiyini deyib.
Bu il «Aşura günü» yanvarın 30-na təsadüf edir. Həmin gündə şiə müsəlmanlar VII əsrdə Kərbəla düzündəki döyüşdə qətlə yetirilən imamları yad edirlər.