Yanvarın 23-də - BMT-nin Qadınlara qarşı ayrı-seçkiliyin bütün formalarının aradan qaldırılması üzrə Komitəsinin 37-ci sessiyasında Azərbaycan «Qadınlara qarşı ayrı-seçkiliyin bütün formalarının aradan qaldırılmasına dair Konvensiya»nın tələblərini necə icra etməsi haqda hesabat verəcək. Ölkə üzrə məruzəni nümayəndə heyətinə rəhbərlik edən Ailə, qadın və uşaq məsələləri üzrə dövlət komitənin sədri Hicran Hüseynova təqdim edəcək.
Komitənin beynəlxalq əlaqələr şöbəsindən Vüsalə Əliyeva «Azadlıq» radiosuna bildirib ki, prezident İlham Əliyevin sərəncamı ilə təsdiq edilən nümayəndə heyətinə daxili işlər nazirinin müavini Oruc Zalov, XİN, Ədliyyə Nazirliyi nümayəndələri, Naxçıvan MR rəhbərliyi və digər rəsmi şəxslər daxildirlər.
Yanvarın 15-də başlayan sessiyada «Qadınlara qarşı ayrı-seçkiliyin bütün formalarının aradan qaldırılması haqqında Konvensiya»ya əməl edilməsi barədə hesabatlar nəzərdən keçiriləcək. Sessiyada Azərbaycan da daxil olmaqla bir sıra ölkələrin məruzəsinin dinlənilməsi və dövrü hesabatlarına baxış nəzərdə tutulur.
