Yanvarın 9-da gündəlik çıxan müstəqil və müxalifət qəzetlərinin redaktorları gələn həftədən qiyməti qaldırmaq haqda qərara gəliblər. «Azadlıq», «Yeni Müsavat», «Gündəlik Azərbaycan» və «Realnıy Azerbaydjan», «Şərq», «Ekspress», «Bizim yol» və başqa qəzetlərin təsisçi və redaktorları bir məsələdə razılığa gələ bilməyiblər. Bəzi redaktorlar qəzetin qiymətini 20 qəpikdən 30-a, digərlərisə 40 qəpiyə qaldırmağın tərəfdarıdırlar.
«Azadlıq» qəzetinin texniki redaktoru Azər Əhmədovun sözlərinə görə, redaktorlar qiyməti neçə faiz qaldırmaq və onu nə vaxtdan tətbiq etmək haqda qərarı gələn həftənin əvvəllərində verəcəklər. O, redaktorların qiymət artımına razılaşmasını belə izah edir: «Bizim qarşımızda iki yol var: Ya qiyməti artırmamaq, bu halda da qəzetin xərci borcunu ödəməyəcək və az sonra çapını dayandıracaq. Ya da oxuculardan üzr istəyərək, qiyməti artırmaqla yaranmış böhrandan çıxmaq».
Yalnız «525-ci qəzet»in redaktoru Rəşad Məcid qiymət artımının əleyhinədir.
Yanvarın 8-dən ölkədə enerjidaşıyıcıları və kommunal xərclərin qiyməti bir neçə dəfə bahalanıb. Buna görə də artıq gündəlik çıxan «Exo» və «Ayna-Zerkalo» qəzetlərinin təsisçiləri onları 10 qəpik bahalandırıblar. Həmin qəzetlər artıq 30 qəpiyə satılır.
İndiyədək ölkədə əksər qəzetlər iyirmi qəpiyə satılırdı.