Yanvarın 9-da səhər saatlarında Heydər Əliyev adına Beynəlxalq Hava Limanının yaxınlığında yerləşən Binə Ticarət Mərkəzində yanğın baş verib. Əzizbəyov Rayon Polis İdarəsindən «Azadlıq» radiosuna verilən məlumatda bildirilir ki, insan tələfatı və yaralı yoxdur. Yanğının böyük ərazini əhatə etmədiyi, bir neçə anbarın yandığı bildirilir. Hazırda dəyən ziyanın miqdarı müəyyənləşdirilir.
Məlumatda o da bildirilir ki, hadisə yerinə baxış keçirən Fövqəladə Hallar Nazirliyi təhqiqat aparır. Yalnız bundan sonra hadisənin səbəbləri haqda informasiya veriləcək. İlkin versiya kimi, yanğına səbəb qısaqapanmanın olduğu deyilir. Amma təhqiqat zamanı başqa versiya da, yanğının qəsdən törədilməsi də araşdırılacaq.
Bu, Binə Ticarət Mərkəzində birinci yanğın hadisəsi deyil. Bir neçə il öncə sözügedən ticarət mərkəzi yanıb külə dönmüşdü. O zaman da mərkəzin qəsdən yandırılması haqda versiyalar səslənmişdi.
