Əsir və İtkin Düşmüş, Girov Götürülmüş Vətəndaşlarla İş üzrə Dövlət Komitəsində İşçi Qrupun rəhbər müavini Eldar Səmədovun «Azadlıq» radiosuna verdiyi məlumata görə, əsgər Eldəniz Nuriyev həqiqətən də hərbi hissədə deyil. İlkin məlumatlara görə, onun Ermənistan Silahlı Qüvvələrinə əsir düşdüyü ehtimal olunur. Komitə artıq Qırmızı Xaç Cəmiyyəti ilə əlaqə saxlayaraq Eldəniz Nuriyevin yerinin müəyyənləşməsi ilə bağlı yardım istəyib. Hazırda əsgərin Ermənistan Silahlı Qüvvələrinə əsir düşməsi məsələsi araşdırılır.
Rusiyanın «Reqnum» Agentliyi Eldəniz Nuriyevin dekabrın 31-də axşam Fizuli rayonu istiqamətində Ermənistan Silahlı Qüvvələri tərəfindən əsir götürüldüyü barədə məlumat yaymışdı.
Ötən ilin dekabr ayında isə daha iki Azərbaycan əsgəri erməni tərəfinə əsir düşüb. Onlardan biri Vüqar Qaracayev dekabrın 23-də azad edilsə də, ertəsi gün-dekabrın 24-də əsir düşmüş Samid Məmmədov hələ də əsirlikdədir.