Mirzə Sakitin Hüquqlarını Müdafiə Komitəsi prezident İlham Əliyevə müraciət edib. Müraciətdə ölkə başçısından Qurban, Həmrəylik və Yeni il bayramları ərəfəsində Mirzə Sakitin azadlığa çıxmasına kömək göstərməsi xahiş olunur. Müdafiə Komitəsi hesab edir ki, satirik-jurnalist uydurma ittihamla həbs edilib. Onun işi ilə bağlı nə istintaq, nə də məhkəmə ədalətli aparılmayıb. Müraciətdə daha sonra vurğulanır ki, Mirzə Sakitin sifarişlə həbsxanada saxlanması Azərbaycanın beynəlxalq imicinə zərbə vurur.
Müdafiə Komitəsi daha sonra prezidentin nəzərinə çatdırır ki, Mirzə Sakitin ürəyində tez-tez ağrılar baş verir. Üstəlik, onun himayəsində işləməyən həyat yoldaşı və beş azyaşlı qızı var. Müraciətdə deyilir ki, prezident hər bir vətəndaşın təhlükəsizliyinin qarantı olduğundan kiminsə haqsız cəza çəkməsinə yol verməməlidir.
«Azadlıq» qəzetinin əməkdaşı Mirzə Sakit bu il iyunun 23-də həbs edilib. Narkotik maddələrin istifadəsində və satışında ittiham edilən satirik-jurnalist oktyabrın 4-də məhkəmənin hökmü ilə üç il müddətinə azadlıqdan məhrum edilib. Müdafiə Komitəsi hesab edir ki, Mirzə Sakitin həbsinə səbəb onun «Azadlıq» qəzetində dərc etdirdiyi satirik şerlərdir.
