Sənəd dərc olunan gün Pentaqona yeni nazir gəlib - Robert Qeyts: «Hamımız Amerikanın oğul və qızlarını evə qaytarmağın yolunu tapmaq istəyirik.
Cənab Qeyts həmin hesabat barədə bir söz deməyib. Ancaq Pentaqonun yeni başçısı yəqin ki, hələ bir müddət hesabatdakı problemlərlə məşğul olacaq.
Sənədə görə, şiə ruhanisi Müqtəda Əs-Sədrin «Mehdi Ordusu» İraqda «Əl-Qaida»nı əvəzləyib, belə ki, dini zəmində zorakılığı qızışdıran ən təhlükəli amilə çevrilib.
ABŞ komandirləri deyirlər ki, qiyamçılar, «Əl-Qaida» yaraqlıları ilə mübarizə aparırlar. Ancaq onlar da hücumların artmasını İraqda sülhün bərpasına ən böyük əngəl hesab edirlər.
Qeyts jurnalistlərə deyib ki, İraqa gedib hər şeyi öz gözüylə görmək istəyir ki, gələcəkdə qərarlar çıxaranda vəziyyət barədə aydın təsəvvürü olsun: «Mən tezliklə İraqa getmək, ordu komandirləri, sıravi heyətlə görüşmək istəyirəm. Mən onların vəziyyətə dair səmimi dəyərləndirməsini eşitmək, gələcəkdə nə etmək barədə yerində məsləhətlər almaq istəyirəm».
Pentaqonun hesabatında deyilir ki, son vaxtlar İraqda həftədə 1.000 hücum olur. Bu hücumlardan ölən vətəndaşların sayı son üç ayda 2 faiz, bu ilin əvvəliylə müqayisədə isə 60 faiz artıb. Sənəddə o da vurğulanır ki, İraq hökumətinin dini zəmində zorakılıqlara son qoya bilməməsi sadə iraqlıların gələcəyə inamını sarsıdıb.
